2025թ. սեպտեմբերի 15-16-ին Երևանում տեղի ունեցավ «Կանայք և գլոբալ անվտանգային ճարտարապետությունը» մտակենտրոնի կողմից կազմակերպված «Համապարփակ անվտանգություն և դիմակայունություն – 2025» համաժողովը։
Հաաժողովի շրջանակներում ԱՊՐԻ Արմենիայի ռազմավարության և զարգացման հարցերով փոխնախագահ Անահիտ Փիլիպպոսյանը հանդես եկավ որպես «Դիմացկունության կառուցում Հայաստան-ԵՄ գործընկերության միջոցով. հնարավորություններ և մարտահրավերներ» խորագիրը կրող պանելային քննարկման մոդերատոր։
Քննարկման բանախոսներն էին ՀՀ Ազգային ժողովի եվրոպական ինտեգրման հարցերի մշտական հանձնաժողովի նախագահ Արման Եղոյանը, Հայաստանում Եվրոպական միության պատվիրակության ղեկավար, արտակարգ և լիազոր դեսպան Ն.Գ. Վասիլիս Մարագոսը, Եվրոպական միության դիտորդական առաքելության ղեկավար Մարկուս Ռիտերը և Հայաստան-ԵՄ քաղհասարակության պլատֆորմի համանախագահ Լուսինե Հակոբյանը։
Քննարկման ընթացքում անդրադարձ է կատարվել Հայաստան-ԵՄ զարգացող գործընկերության առավելություններին ու սահմանափակումներին։ Մասնակիցները քննարկել են Համապարփակ և ընդլայնված գործընկերության համաձայնագրի (CEPA) ձեռքբերումները՝ միաժամանակ ընդգծելով դրա իրականացման գործնական մարտահրավերները։ Նրանք անդրադարձել են այն ոլորտներին, որտեղ առաջընթացն ակնհայտ է՝ ինչպես, օրինակ, բարեփոխումները, կառավարումը և անվտանգության ոլորտում համագործակցությունը, միաժամանակ նշելով այն ինստիտուցիոնալ և հասարակական խոչընդոտները, որոնք դեռևս պետք է հաղթահարվեն։
Միավորելով կառավարության, դիվանագիտական, քաղաքացիական հասարակության և անվտանգության ոլորտի առաջատար ներկայացուցիչներին՝ քննարկման մասնակիցները վերահաստատեցին Գործընկերության համապարփակ բնույթը, որտեղ ներգրավված են բազմաթիվ շահառուներ, ինչպես նաև Գործընկերության ողջ ներուժն իրացնելու գործում գործընթացների նկատմամբ պատասխանատվության կարևորությունը։
